پاکستان اور آئی ایم ایف کے درمیان کل سے دوحہ میں مذاکرات شروع
قرض پروگرام :پاکستان اور آئی ایم ایف کے درمیان مذاکرات کل سے دوحہ میں شروع ہوں گے
اسلام آباد (سوسائٹی نیوز)
پاکستان اور آئی ایم ایف کے درمیان مذاکرات کل سے دوحہ شروع ہوں گے ، مذاکرات 25 مئی تک جاری رہنے کا امکان ہے۔
تفصیلات کے مطابق پاکستان آئی ایم ایف سے قرض پروگرام بڑھانے یا جاری رکھنے کیلئے مذاکرات کل سے دوحہ میں شروع کرے گا، جو پچیس مئی تک جاری رہنے کا امکان ہے۔
ذرائع کا کہنا ہے کہ پاکستانی وفد کی سربراہی سیکرٹری خزانہ کریں گے جبکہ پاکستانی وفد میں وزارت خزانہ، ایف بی آر، اسٹیٹ بینک اور وزارت توانائی کے نمائندے شریک ہوں گے۔
وزیر خزانہ مفتاح اسماعیل آئی ایم ایف مذاکرات میں ایک دو دن بعد شریک ہوں گے۔
ذرائع نے بتایا ہے کہ بگڑتی ہوئی ملکی معاشی صورتحال کی وجہ سے شہباز شریف آج تمام حکومتی اتحادیوں سے مل کر یہ فیصلہ کریں گے کہ وہ حکومت جاری رکھیں گے یا پھر نئے الیکشن کی طرف جانا ہے۔
- خیال رہے آئی ایم ایف نے ملک میں جاری تیل، بجلی پرتمام سبسڈی ختم کرنے کا مطالبہ کیا جبکہ اگلے مالی سال میں ٹیکس وصولیوں کا ہدف بھی تقریبا ڈبل کرنے کا مطالبہ کر رہی ہے۔
