محکمہ زراعت پنجاب کے زیر اہتمام 28 جنوری سے دو روزہ بین الاقوامی نمائش”کھاد میلہ و پاکستان ہارٹی ایکسپو 2023 کا انعقاد
محکمہ زراعت پنجاب کے زیر اہتمام 28 جنوری سے دو روزہ بین الاقوامی نمائش”کھاد میلہ و پاکستان ہارٹی ایکسپو 2023 ” کا انعقاد
نمائش میں بزنس ٹو بزنس میٹنگز و بین الاقوامی سیمینار کا خصوصی اہتمام ہوگا
لاہور /ملتان( سوسائٹی نیوز )
ترجمان محکمہ زراعت پنجاب کے مطابق محکمہ زراعت کے زیرِ اہتمام دو روزہ بین الاقوامی نمائش” کھاد میلہ و پاکستان ہارٹی ایکسپو2023 ”کا انعقاد کیا جا رہا ہے جس میں پاکستانی پھلوں،سبزیوں اوران سے بنی مصنوعات کو بین الاقوامی سطح پر اجاگر کیا جائے گا۔اس دو روزہ نمائش کے لئے 28 اور29جنوری کو سٹالز ایکسپو سنٹر جوہر ٹاؤن لاہورمیں لگائے جائیں گے۔
ترجمان محکمہ زراعت نے کہا کہ اس نمائش کے موقع پر کاشتکاروں کے لئے اُن کے دستیاب بجٹ کے مطابق کھادوں کے متوازن استعمال کے متعلق تیار کردہ موبائل ایپلکیشن ” کھاد حساب” کا باقاعدہ افتتاح کیا جا ئے گا اور کاشتکاروں کو اس کے متعلق راہنمائی فراہم کی جائے گی تاکہ فصلوں کی فی ایکڑ پیداوار بڑھانے کے لئے متوازن کھادوں کے استعمال کو فروغ دیا جا سکے۔
امسال اس نمائش میں 100سے زائد سٹالز لگائے جائیں گے اور سعودی عرب،موریشیش،سری لنکا،جنوبی افریقہ،کینیا بحرین تاجکستان،قازقستان اور روس سے45 ماہرین ایکسپوٹرزو دیگر اسٹیک ہولڈرز شرکت کریں گے۔
اس موقع پر بزنس ٹو بزنس میٹنگز کا اہتمام بھی کیا گیا ہے تاکہ زرعی برآمدات میں اضافہ ہو سکے۔
ترجمان محکمہ زراعت پنجاب نے مزید بتایا کہ اس نمائش سے قبل محکمہ زراعت ایسی آٹھ نمائشوں کا انعقاد کر چکا ہے جس میں مجموعی طور پر 20 ممالک سے 150 سے زائد وفود نے شرکت کی۔ ان نمائشوں کے انعقاد سے پاکستانی برآمدات میں مجموعی طور پر20 ملین ڈالرز کا اضافہ ہوا تھا۔ پاکستان ہارٹی ایکسپو2023 کے انعقادسے زرعی شعبہ سے وابستہ لوگوں کو ایک ایسا پلیٹ فارم مہیا کیا جا رہا ہے جو پاکستانی مصنوعات کو پوری دنیا میں متعارف کروانے کا ذریعہ بنے گا اور ہماری زرعی برآمدات میں اضافہ ہوگا۔
