نگران وزیراعلی محسن نقوی کی نہتے کشمیریوں کی جدوجہد کو سلام،کشمیر ڈے بھرپورطریقے سے منانے ہدایت،کسانوں کے مسائل کے فوری حل کیلئے ہنگامی بنیادوں پر انقلابی فیصلوں کا اعلان

نگران وزیراعلیٰ محسن نقوی کا مشکلات کا شکار کسانوں کے مسائل کے فوری حل کی خاطر ہنگامی بنیادوں پر انقلابی فیصلوں کا اعلان

 پروگریسو فارمرز کے50رکنی وفد کو ملاقات کیلئے وزیراعلیٰ آفس بلا کر بریفنگ لی، کاٹن، گندم،گنا اور دیگرفصلوں کی بہتر پیداوار کیلئے تجاویز

ملاقات میں زرعی اجناس،لائیوسٹاک او رفش کی زیادہ پیداوار کیلئے موثر اقدامات کرنے اور ریسرچ کو فروغ دینے پر اتفاق

 اپٹما فاؤنڈیشن کی طرف سے کاٹن کی کاشت بڑھانے کیلئے ریسرچ کی خاطر 100کروڑ روپے کے فنڈ کے قیام کااعلان

نگران وزیراعلیٰ نے زرعی شعبہ کی بہتری،پیداوار میں اضافے اور مارکیٹ تک آسان رسائی کیلئے ٹاسک فورس کے قیام کی منظوری دی

 تمام وزراء کو ڈویژن کی سطح پر کاشتکارو ں کے ساتھ ملاقات کاٹاسک، کھاد کی بلیک مارکیٹنگ روکنے کیلئے موثر اقدامات کی ہدایت

لاہور(سوسائٹی نیوز)

نگران وزیراعلیٰ پنجاب محسن نقوی نے مشکلات کا شکار پنجاب کے کاشتکاروں اور کسانوں کے مسائل کے فوری حل کی خاطرہنگامی بنیادوں پر انقلابی فیصلوں کااعلان کیاہے۔نگران وزیراعلیٰ محسن نقوی نے پروگریسو فارمرز کے50رکنی وفد کو ملاقات کے لئے آج وزیراعلیٰ آفس بلا کر بریفنگ لی۔نگران وزیراعلیٰ محسن نقوی سے پروگریسوفارمرز کے وفدنے تفصیلی ملاقات کی اور کاٹن، گندم،گنا،مکئی اور دیگرفصلوں کی بہتر پیداوار کے لئے تجاویز پیش کیں۔لائیوسٹاک اور فش فارمرز نے مسائل اور سفارشات بیان کیں۔ملاقات میں زرعی اجناس،لائیوسٹاک او رفش کی زیادہ پیداوار کے لئے موثر اقدامات کرنے اور ریسرچ کو فروغ دینے پر اتفاق کیا گیا۔گوہر اعجاز نے اپٹما فاؤنڈیشن کی طرف سے کاٹن کی کاشت بڑھانے کے لئے ریسرچ کی خاطر 100کروڑ روپے کے فنڈ کے قیام کااعلان کیا۔نگران وزیراعلیٰ محسن نقوی نے زرعی شعبہ کی بہتری،پیداوار میں اضافے اور مارکیٹ تک آسان رسائی کے لئے ٹاسک فورس کے قیام کی منظوری دی۔نگران وزیراعلیٰ محسن نقوی ٹاسک فورس کے چیئرمین ہوں گے۔ٹاسک فورس میں نگران صوبائی وزیر صنعت ایس ایم تنویر، سیکرٹریز زراعت،آبپاشی، لائیوسٹاک، زرعی ریسرچ اداروں کے سربراہان،گوہر اعجاز، سید یاور علی، ذکا اشرف اور فواد مختار شامل ہوں گے۔ٹاسک فورس 7روز میں زرعی پیداوار میں اضافے،نئے بیجوں کے استعمال، مارکیٹ تک آسان رسائی اور دیگر امور کے بارے میں سفارشات پیش کرے گی۔نگران وزیراعلیٰ محسن نقوی نے کہاکہ ٹاسک فورس کی سفارشات کی روشنی میں فی الفور فیصلے کئے جائیں گے۔نگران وزیراعلیٰ محسن نقوی نے تمام وزراء کو ڈویژن کی سطح پر کاشتکارو ں کے ساتھ ملاقات کاٹاسک دیا۔ صوبائی وزراء کمشنرز کے ساتھ مل کر کاشتکارو ں کے مسائل سنیں گے اور ان کے حل کے لئے ضروری اقدامات کریں گے۔اپٹما فاؤنڈیشن زرعی یونیورسٹیوں میں کاٹن اوردیگر فصلوں کے بہتر بیج پر ریسرچ کے لئے فنڈنگ کرے گی۔نگران وزیراعلیٰ محسن نقوی نے کھاد کی فراہمی یقینی بنانے اور بلیک مارکیٹنگ روکنے کے لئے موثر اقدامات کی ہدایت کی جبکہ ٹیوب ویل کے بجلی بل میں جی ایس ٹی پر سبسڈی بحال کرنے کے لئے وفاقی حکومت سے رجوع کرنے کافیصلہ کیاگیا۔نگران وزیراعلیٰ محسن نقوی نے لمپی سکن ویکسی نیشن مہم تیز کرنے کی ہدایت کی اور فش فارمرزکے مسائل حل کرنے کے لئے تجاویز مرتب کرنے کا حکم دیا۔ لاہور میں فش مارکیٹ منتقل کرنے کے لئے قابل عمل اقدامات کاجائزہ لیاگیا۔اٹک میں فصلیں تباہ کرنے والے جانور تلف کرنے پر اتفاق کیاگیا۔محسن نقوی نے کہا کہ کاشتکاروں کے مسائل حل کرنا چاہتے ہیں اورجو کچھ بھی ہوسکا وہ کریں گے۔ پروگریسو فارمرز کے وفد میں خالد محمود کھوکھر، چوہدری جواد احمد، چوہدری حسن اکرم،چوہدری رضوان اقبال،چوہدری بلال ارشد، چوہدری محمد یاسین، ابو بکر توصیف، حافظ محمد حفیظ، سید شفقت حسین بخاری اور دیگر شامل تھے۔صوبائی وزراء ایس ایم تنویر،عامرمیر، گوہر اعجاز، سید یاور علی، چوہدری ذکاء اشرف، فواد مختار، سیکرٹریز زراعت،آبپاشی، لائیوسٹاک، وائس چانسلر یونیورسٹی آف ایگریکلچر فیصل آباد اور متعلقہ حکام بھی اس موقع پر موجود تھے۔

٭٭٭

نگران وزیراعلیٰ پنجاب محسن نقوی کی صوبہ بھر میں یوم یکجہتی کشمیربھرپور طریقے سے منانے کی ہدایت

 ڈویژنل ہیڈکوارٹرز، اضلاع اور تحصیلوں میں یوم یکجہتی کشمیر کے اجتماعات ہوں گے، شہر شہر ریلیاں نکالی جائیں گی:محسن نقوی

عوام یوم یکجہتی کشمیر کے اجتماعات میں بھرپور شرکت کریں، لوگ ریلیوں میں پاکستان اور کشمیر کے پرچم لے کر نکلیں

لاہور(سوسائٹی نیوز)

نگران وزیراعلیٰ پنجاب محسن نقوی نے صوبہ بھر میں یوم یکجہتی کشمیر کو بھرپور طریقے سے منانے کی ہدایت کرتے ہوئے کہا ہے کہ پنجاب کے ڈویژنل ہیڈکوارٹرز، اضلاع اور تحصیلوں میں یوم یکجہتی کشمیر کے اجتماعات ہوں گے اور کشمیریوں سے یکجہتی کیلئے شہر شہر ریلیاں نکالی جائیں گی۔نگران وزیراعلیٰ محسن نقوی نے عوام سے یوم یکجہتی کشمیر کے اجتماعات میں بھرپور شرکت کی اپیل کرتے ہوئے کہا کہ لوگ ریلیوں میں پاکستان اور کشمیر کے پرچم لے کر نکلیں۔ انہوں نے کہا کہ 5 فروری کو قوم مقبوضہ کشمیر میں بھارتی مظالم کے خلاف اپنے کشمیری بہن بھائیوں کے ساتھ بھرپور یکجہتی کا اظہار کرے گی۔ کشمیر کے عوام کو پیغام دینا چاہتے ہیں کہ وہ اپنی جدوجہد آزادی میں تنہا نہیں بلکہ پوری پاکستانی قوم ان کے ساتھ ہے اور پاکستان کا بچہ بچہ مظلوم کشمیریوں کے ساتھ ہے۔نگران وزیراعلیٰ محسن نقوی نے کہا کہ بھارت ظلم و جبر سے زیادہ دیر تک کشمیر پر اپنا قبضہ برقرار نہیں رکھ سکتا۔

٭٭٭٭

نہتے کشمیریوں کی عظیم جدوجہد کو سلام پیش کرتے ہیں،نگران وزیراعلیٰ پنجاب محسن نقوی کا یوم یکجہتی کشمیر پر پیغام

 بھارت کشمیریوں پر ظلم کر رہا ہے، روزانہ ماؤں کے بیٹے مارے جا رہے ہیں، خواتین کی عصمت دری اور ہراساں کیا جاتا ہے

بھارتی مظالم پر اقوام عالم کی خاموشی کا کوئی جواز نہیں،جنوبی ایشیا میں پائیدار امن کیلئے سلامتی کونسل کی قرارداد کے مطابق حق خودارادیت ناگزیر ہے

 پاکستانی قوم 5اگست2019 سے فوجی محاصرے اور مواصلاتی ناکہ بندی کے شکارکشمیری بہن بھائیوں کیلئے بھرپور حمایت کااعادہ کرتی ہے

 لاہور(سوسائٹی نیوز)

نگران وزیراعلیٰ پنجاب محسن نقوی نے کہا ہے کہ نہتے کشمیریوں کی عظیم جدوجہد کو سلام پیش کرتے ہیں۔ پاکستانی قوم کشمیری عوام کے ساتھ کھڑی ہے اور کھڑی رہے گی۔ بھارت کشمیریوں پر ظلم کر رہا ہے، روزانہ ماؤں کے بیٹے مارے جا رہے ہیں، خواتین کی عصمت دری اور ہراساں کیا جاتا ہے۔ بھارت نے کشمیری بہن بھائیوں کے بنیادی حقوق سلب کئے ہوئے ہیں۔کشمیری عوام کے ساتھ بھارت کے روا رکھے جانے والے غیر انسانی سلوک کی بھرپور مذمت کرتے ہیں۔نگران وزیراعلیٰ محسن نقوی نے یوم یکجہتی کشمیر پر اپنے پیغام میں کہا کہ کشمیری عوام کئی دہائیوں سے بھارتی فوج کے بھیانک جبر کا جرأت مندی سے مقابلہ کر رہے ہیں۔کشمیری لاک ڈاؤن میں زندگی گزار رہے ہیں،اقوام عالم کو کشمیریوں کے دکھ درد کا احساس ہونا چاہیئے۔جنوبی ایشیا میں پائیدار امن کے لئے سلامتی کونسل کی قرارداد کے مطابق کشمیریوں کاحق خودارادیت ناگزیر ہے۔ انہوں نے کہا کہ بھارتی مظالم پر اقوام عالم کی خاموشی کا کوئی جواز نہیں۔ دنیا جان لے کہ کشمیریوں کا حق خودارادیت کوئی نہیں چھین سکتا۔ بھارت کو کشمیریو ں پر اپنا وحشیانہ جبر بند کرناچاہیئے او رانسانی حقوق کی پاسداری کرنی چاہیئے۔ کشمیری گزشتہ 7 دہائیوں سے غیر متزلزل عزم کا مظاہرہ کر رہے ہیں۔نگران وزیراعلیٰ محسن نقوی نے کہا کہ پاکستانی قوم 5اگست2019 سے فوجی محاصرے اور مواصلاتی ناکہ بندی کے شکارکشمیری بہن بھائیوں کے لئے بھرپور حمایت کااعادہ کرتی ہے۔