وزیراعلی چوہدری پرویز الہی کا جام پور کو ضلع کا درجہ دینے کا اعلان

وزیراعلیٰ پنجاب چودھری پرویزالٰہی جام پورکے عوام کی آواز بن گئے، جام پور کو ضلع کا درجہ دینے کااعلان

 داجل اور محمد پور کوضلع جام پورکی تحصیلوں کا درجہ دیاجائے گا، جام پورکو پنجاب کا بہترین ضلع بناؤں گا، یہ میرا عزم ہے،سروس ڈلیوری کا عمل بہتر ہوگا

 ضلع بننے سے جام پورکے علاقوں میں ترقی ہوگی اور عوام کے مسائل نچلی سطح پر حل ہوں گے، ملازمتوں کے ہزاروں نئے مواقع پیدا ہوں گے

 پرویزالٰہی کے شکر گزار ہیں جنہوں نے جام پور کے عوام کا دیرینہ مسئلہ حل کیا، فیصلے کو تحسین کی نظر سے دیکھتے ہیں:نصر اللہ دریشک، محسن لغاری

وزیراعلیٰ کی زیر صدارت اجلاس، راجہ بشارت، نصر اللہ دریشک، محسن لغاری، فاروق امان اللہ دریشک، اویس دریشک، مینا لغاری اور علی بہادر دریشک کی شرکت

لاہور(سوسائٹی نیوز)

وزیراعلیٰ پنجاب چودھری پرویزالٰہی جام پورکے عوام کی آواز بن گئے۔وزیراعلیٰ چودھری پرویزالٰہی نے جام پور کو ضلع کا درجہ دینے کااعلان کیاہے۔وزیراعلیٰ چودھری پرویزالٰہی کی زیر صدارت آج وزیراعلیٰ آفس میں اعلیٰ سطح کا اجلاس منعقد ہوا، جس میں صوبائی وزیر راجہ بشارت، رکن قومی اسمبلی سردار نصر اللہ خان دریشک، صوبائی وزیر سردار محسن خان لغاری، ایم پی اے فاروق امان اللہ دریشک، سردار اویس دریشک،چودھری ظہیر الدین، سابق رکن اسمبلی مینا لغاری،دلدار چیمہ اور علی بہادر دریشک نے شرکت کی،ایڈیشنل چیف سیکرٹری داخلہ کیپٹن (ر) اسد اللہ خان، پرنسپل سیکرٹری وزیراعلیٰ محمد خان بھٹی،قائمقام سینئر ممبر بورڈ آف ریونیو نوید شیرازی، ڈی سی راجن پور اور متعلقہ حکام بھی موجود تھے جبکہ کمشنر ڈیرہ غازی خان ڈویژن ویڈیولنک کے ذریعے اجلاس میں شریک ہوئے۔

وزیراعلیٰ چودھری پرویزالٰہی نے اجلاس سے خطاب کرتے ہوئے کہا کہ داجل اور محمد پور کو ضلع جام پورکی تحصیلوں کا درجہ دیاجائے گا۔ انہوں نے کہا کہ جام پورکے عوام کے دیرینہ مطالبے پر ضلع بنانے کا فیصلہ کیا ہے۔ جام پورکو پنجاب کا بہترین ضلع بناؤں گا، یہ میرا عزم ہے۔ ضلع بننے سے جام پورکے علاقوں میں ترقی ہوگی اور عوام کے مسائل نچلی سطح پر حل ہوں گے۔ نیا ضلع بننے سے جام پورمیں ملازمتوں کے ہزاروں نئے مواقع پیدا ہوں گے۔ جام پور، محمد پور او رداجل میں سروس ڈلیوری کا عمل بہتر ہوگا۔

انہوں نے کہاکہ جام پور میں یونیورسٹی بنانا بھی ہماری ترجیحات میں شامل ہے۔ جام پور میں یونیورسٹی بننے سے طلبہ خاص طور پر طالبات کو اعلیٰ تعلیم کے مواقع میسرآئیں گے۔ جام پور میرے لئے گجرات کی طرح ہے، دل وجان سے ترقی چاہتاہوں۔

رکن قومی اسمبلی نصر اللہ دریشک نے کہاکہ جام پور کو ضلع کادرجہ دینے کے اعلان پر وزیراعلیٰ چودھری پرویزالٰہی کے شکر گزا رہیں۔وزیراعلیٰ چودھری پرویزالٰہی نے جام پور کے عوام کا دیرینہ مسئلہ حل کردیا ہے۔ محسن لغاری نے کہاکہ جام پور کے عوام وزیراعلیٰ چودھری پرویزالٰہی کے اس فیصلے کو تحسین کی نظر سے دیکھتے ہیں۔