وزیر اعلی چوہدری پرویز الہی سے ملاقات میں چینی قونصل جنرل کا لاہور میں سمو گ سے بچاو کی ٹیکنالوجی فراہم کرنے،پنجاب میں چینی کمپنیوں کی سرمایہ کاری کرنے،پنجاب کے طالبعلموں کیلئے 6ملین کے سکالر شپ اور سیلاب زدگان کیلئے 3کروڑ کی وزیراعلی ریلیف فنڈ میں امداد کا اعلان
وزیراعلیٰ چودھری پرویز الٰہی سے چین کے قونصل جنرل زاؤ شیرین کی ملاقات، سموگ پر قابوپانے کیلئے چینی ٹیکنالوجی سے استفادہ
لاہوراوردیگر شہروں میں ہوا صاف کرنے کیلئے ایئر پیوریفائیڈ ٹاورزسرحدی علاقے اورصنعتی علاقوں کے قریب لگائے جائینگے
ایئر پیوریفائیڈ ٹاورزکو پیشگی فلڈ وارننگ اوردیگر مقاصد کیلئے بھی استعمال میں لایاجائے گا:پرویزالٰہی
چین کے قونصل جنرل نے وزیراعلیٰ چودھری پر ویزالٰہی کو وزیراعلیٰ فلڈ ریلیف فنڈ میں 3کروڑ روپے کی مالی امدادکا چیک دیا
چینی قونصل جنرل کا پنجاب کے طلباء کیلئے رواں برس 6ملین روپے کے سکالر شپ کا اعلان،وظائف میں مزید اضافے کااعلان
پنجاب میں سرمایہ کاری کیلئے ماحول سازگارہے،چین کی کمپنیاں سرمایہ کاری کی خواہاں ہیں،تعاون بڑھانے کیلئے اقدامات جاری رکھیں گے:چینی قونصل جنرل
لاہور(سوسائٹی نیوز)
وزیراعلیٰ پنجاب چودھری پرویز الٰہی سے آج وزیراعلیٰ آفس میں چین کے قونصل جنرل زاؤ شیرین (Mr. Zhao Shiren) نے ملاقات کی اور باہمی دلچسپی کے امور،مختلف شعبوں میں تعاون بڑھانے خصوصا سموگ پر قابوپانے کے حوالے سے تبادلہ خیال کیاگیا۔سموگ پر قابو پانے کیلئے ہوا کو صاف کرنے کے ٹاورلگانے کے حوالے سے باہمی تعاون کو فروغ دینے پر اصولی اتفاق ہوا۔
وزیراعلیٰ نے کہا کہ سموگ ایک عالمی مسئلہ بن چکا ہے۔پنجاب خصوصا لاہور میں سموگ پر قابو پانے کیلئے چینی ٹیکنالوجی سے استفادہ کرنا چاہتے ہیں۔لاہوراوردیگر شہروں میں ہوا صاف کرنے کے ٹاورزلگانے کیلئے چینی ٹیکنالوجی سودمند ثابت ہوگی۔ایئر پیوریفائیڈ ٹاورزسرحدی علاقے اورصنعتی علاقوں کے قریب لگائے جائیں گے۔ ان ٹاورز کو پیشگی فلڈ وارننگ اوردیگر مقاصد کیلئے بھی استعمال میں لایاجائے گا۔ پنجاب حکومت نے سموگ پر قابو پانے کیلئے ماحولیاتی ایمرجنسی نافذ کی ہے۔
چینی قونصل جنرل نے پنجاب کے طلباء کیلئے رواں برس 6ملین روپے کے سکالر شپ کا اعلان بھی کیا۔چین کے قونصل جنرل نے وزیراعلیٰ چودھری پر ویزالٰہی کو وزیراعلیٰ فلڈ ریلیف فنڈ میں 3کروڑ روپے کی مالی امدادکا چیک دیا۔
وزیراعلیٰ چودھری پرویزالٰہی نے سیلاب متاثرین کیلئے مالی معاونت پر چین کی حکومت اورچینی قونصل جنرل کا شکریہ ادا کیا۔
وزیراعلیٰ چودھری پرویزالٰہی نے اس موقع پر گفتگو کرتے ہوئے کہا کہ پنجاب حکومت سیلاب متاثرین کی مالی مدد پر چینی حکومت کی مشکور ہے۔وفاقی حکومت نے پنجاب حکومت کو سیلاب متاثرین کی بحالی و آبادکاری کیلئے ایک پائی تک نہیں دی۔ہم اپنے وسائل سے سیلاب متاثرین کی بحالی و آبادکاری کررہے ہیں۔
وزیراعلیٰ پرویزالٰہی نے کہا کہ نئے چینی قونصلیٹ کیلئے پنجاب حکومت ہر ممکن تعاون کرے گی۔
چینی قونصل جنرل نے نئے قونصلیٹ کے حوالے سے تعاون کی یقین دہانی پر وزیراعلیٰ چودھری پرویزالٰہی کا شکریہ ادا کیا۔
چینی قونصل جنرل نے کہا کہ اگلے برس پنجاب کے طلبہ کے لئے چینی سکالر شپ میں مزید اضافہ کریں گے۔ پنجاب میں سرمایہ کاری کیلئے انتہائی سازگار ماحول ہے۔چین کی کمپنیاں پنجاب میں سرمایہ کاری کی خواہاں ہیں۔ مختلف شعبوں میں تعاون بڑھانے کے لئے ہرممکن اقدامات جاری رکھیں گے۔چینی قونصل جنرل نے وزیراعلیٰ چودھری پرویزالٰہی کو چینی قونصلیٹ اورسفارت خانے کے دورے کی دعوت دی۔چینی قونصل جنرل کے چیف آف پولیٹیکل سیکشن یان ینگ (Mr. Yan Yang) بھی اس موقع پر موجود تھے۔چیف سیکرٹری عبداللہ خان سنبل، سینئر ممبر بورڈ آف ریونیو زاہد اختر زمان، سابق پرنسپل سیکرٹری وزیراعلیٰ جی ایم سکندر، سابق صدر بینک آف پنجاب ہمیش خان، سیکرٹری ماحولیات،ذیشان ذکریا اور متعلقہ حکام بھی اس موقع پر موجود تھے۔
