ڈاکٹر شہباز گل گرفتار،بغاوت کا مقدمہ درج

ڈاکٹر شہباز گل گرفتار، بغاوت کا مقدمہ درج

اسلام آباد(سوسائٹی نیوز)

 پاکستان تحریک انصاف کے رہنما اور عمران خان کے چیف آف سکیورٹی سٹاف ڈاکٹر شہباز گل کو گرفتار کر کے ان کے خلاف بغاوت کا مقدمہ درج کر لیا گیا ہے۔

گرفتاری کے تقریباً دو گھنٹے بعد اسلام آباد کے تھانہ کوہسار میں شہباز گل کے خلاف بغاوت، اداروں کے خلاف اکسانے کی دفعہ کے تحت مقدمہ درج کیا گیا۔

شہباز گل کے خلاف درج مقدمے میں سنگین نوعیت کی 10 دفعات شامل کی گئی ہیں۔

ایف آئی آر کے متن میں لکھا گیا ہے کہ شہباز گل نے نجی ٹی وی پروگرام میں فوج کو تقسیم کرنے کی کوشش کی، شہباز گل نے فوج کے مختلف رینک کے افسران کو سیاسی جماعت سے جوڑنے کی کوشش کی

مقدمے کے متن میں لکھا گیا ہے کہ شہباز گل نے اسی طرح سول بیوروکریسی کو بھی بغاوت پر اکسایا اور دھمکایا اور ریاستی اداروں بشمول سول بیوروکریسی کو اکسانے کی کوشش کرتے ہوئے کہا کہ وہ اعلیٰ افسران کے احکامات نہ مانیں۔