کامران ٹیسوری نئے گورنر سندھ تعینات
کامران ٹیسوری گورنر سندھ تعینات،صدر مملکت نے منظوری دے دی
اسلام آباد(سوسائٹی نیوز)
صدر مملکت نے کامران ٹیسوری کی بطور گورنر سندھ تعیناتی کی منظوری دے دی۔
تفصیلات کے مطابق صدر مملکت عارف علوی نے آئین کے آرٹیکل 101، ون کے تحت کامران ٹیسوری کی بہ طور گورنر سندھ منظوری دے دی۔
گورنر سندھ کا عہدہ عمران اسماعیل کے استعفے کے بعد سے خالی تھا، وزیر اعظم پاکستان شہباز شریف کی جانب سے نئے گورنر سندھ کی تعیناتی کی سمری صدر مملکت کو بھجوائی گئی تھی۔
سندھ اور وفاقی حکومتوں کی مشاورت کے بعد کامران خان ٹیسوری کا نام عہدے کے لیے فائنل کیا گیا تھا۔
نئے گورنر سندھ کامران ٹیسوری کون ہیں؟
ایم کیو ایم رہنما کامران ٹیسوری گورنر سندھ کے عہدے پر فائز ہو گئے۔
ایم کیو ایم پاکستان کے ڈپٹی کنوینر کامران ٹیسوری 5 مئی 1974 کو کراچی میں پیدا ہوئے، ان کا تعلق پاکستان کے ایک کاروباری خاندان سے ہے۔
کامران ٹیسوری نے بھی اپنا خاندانی کاروبار سنبھالا اور سابق صدر پرویز مشرف کے دور میں 3 بار بزنس مین آف دا ایئر کا ایوارڈ جیتا۔
کامران ٹیسوری نے 12 سال قبل سیاست میں قدم رکھا اور اپنے سیاسی سفر کا آغاز مسلم لیگ فنکشنل میں شمولیت اختیار کر کے کیا، 4 سال بعد کامران ٹیسوری نے مسلم لیگ فنکشنل کو خیرباد کہہ کر ایم کیو ایم پاکستان میں شمولیت اختیار کر لی۔
صدر مملکت نے کامران ٹیسوری کی بطور گورنر سندھ تعیناتی کی منظوری دے دی
متحدہ قومی موومنٹ پاکستان میں انھیں ڈپٹی کنوینر کا عہدہ ملا تاہم 2018 میں سینیٹ انتخابات میں ڈاکٹر فاروق ستار کے نامزد کردہ کامران ٹیسوری کو پارٹی کی جانب سے ٹکٹ نہ ملنے پر فاروق ستار نے ایم کیو ایم سے علیحدگی اختیار کر لی۔
کامران ٹیسوری نے بھی فاروق ستار کا ساتھ دیا تھا، جس پر ایم کیو ایم نے فاروق ستار اور کامران ٹیسوری کو پارٹی سے نکال دیا۔
9 ستمبر 2022 کو کامران ٹیسوری نے ایک بار پھر ایم کیو ایم پاکستان میں شمولیت اختیار کی اور رابطہ کمیٹی نے انھیں ڈپٹی کنوینر کے عہدے پر بحال کیا۔
