خان صاحب نے فرمایا کہ قران کی آیت ہے کہ دوسروں کے عیبوں پر پردہ ڈالو،گزارش ہے کہ ایسی کوئی آیت نہیں۔ مفتی منیب الرحمن

کراچی (سوسائٹی نیوز)

ممتاز عالمِ دین مفتی منیب الرحمن نے پاکستان تحریک انصاف کے چیئرمین عمران خان کی تصحیح کر دی۔سماجی رابطے کی ویب سائٹ ٹوئٹر پر ممتاز عالمِ دین مفتی منیب الرحمن نے کہا کہ خان صاحب نے فرمایا ہے کہ قرآن کی آیت ہے کہ دوسروں کے عیبوں پر پردہ ڈالو۔ان سے گزارش ہے کہ قرآنِ کریم میں ایسی کوئی آیت نہیں ہے۔

مفتی منیب الرحمن نے کہا ہے کہ قرآنِ کریم میں اللہ تعالی نے عیب جوئی، طعن و تشنیع، ٹوہ لگانے، تمسخر اڑانے، برے ناموں سے پکارنے، بدگمانی، تجسس اور غیبت سے منع فرمایا ہے۔انہوں نے کہا کہ حدیثِ پاک میں البتہ دوسروں کے عیوب پر پردہ ڈالنے کی ترغیب بھی دی گئی ہے اور اس کا اجر بھی بیان فرمایا گیا ہے مگر یہ سب کے لیے ہے، نیز عزت کمانے کے لیے دوسروں کی عزت کرنی پڑتی ہے۔مفتی منیب الرحمن نے دعا کی ہے کہ اللہ تعالی ہم عاجز بندوں سمیت خان صاحب اور سارے سیاسی قائدین کو کتاب و سنت کے احکام پر عمل کی توفیق عطا فرمائے۔